Аз жаргалын эрэлд

Хайр хайрын дунд

Хатаж барьцалдсан ургаа хад

Халамж энхрийллийн хооронд

Хэлхэлдэж үүссэн босоо хана

    Мэдэрч сэрэх чинь хайр шиг ч гэлээ

    Маргаашийн насгүй дасал шүү дээ

    Гуниглаж санах чинь хайр шиг ч гэлээ

    Ганцаардлаас зугтсан айдас шүү дээ

Хайр чи мөн үү гэж

Хамаг чангаараа асуухад минь

Хаданд туссан цуурай чинь

Хуурамч өнгөөр тиймээ гэдэг

    Яхир тэр цуурай угтаа

    Янгинатал хүлсэн даслын чимээ

    Яаруухан товлосон болзооны

    Ялдамхан инээмсэглэлд хүлэгдсэний дохио

Аяа дасал чи юутай хүчтэй юм бэ

Алаг үүлсийн цаадах

Аглаг тэр ойн цоорхой руу

Чанх урагшаа би явлаа

Чамайг би мартахаар шийдлээ...